जमानो
..............
केती चमकन रेयेर
जमानो छेनी
स्वता चमकेरो जमानो छ.
केरी धमकीती जपेर जमानो छेनी
स्वतार धमक वतायेर जमानो छ.
इतिहास दखल लछं
ओच सारी लोकूरी
जे अपार कष्ट करन,लढन,
झगडन संघर्षेती
नवनिर्माण किदे.
इतिहास लिकनाके
भूगोल बदलानाके.
स्वतार गणिती सुत्रेर जोरेपर
जिंदगीरी भाषा बदलानाके.
प्रेरणा ओनूर लेन
स्वतः प्रेरित हेयेरो
जमानो छ.
केती चमकन रेयेर
जमानो छेनी
स्वता चमकेरो
जमानो छ.
आयेदो कसेही ढग, वादळ, चक्री, भवरी
आडे लकडा तमार वाट अडायेन.
तमार प्रामाणिक प्रयत्नेर किरणेती अडथळा निष्प्रभ करेरो जमानो छ..
खरेर सोजा लेयेरो
सत्य धुंडन काढेरो
खोटेन उघडो पाडन
अंधारो दूर करन
वजाळो पाडेरो जमानो छ..
केती चमकन रेयेर
जमानो छेनी
स्वता चमकेरो
जमानो छ.
केरी धमकीती जपेर जमानो छेनी
स्वतार धमक वतायेर जमानो छ.
...........................
✍️
EKNATH L. GOFANE .
Comments