तांडेर बालपण (बचपण) कवी-✍ निरंजन मुडे.

हारदावं कालपण, हारदावं आजपण...!

आसो वेतो हामारो तांडेरो बालपण...!!

धुडेम रमेरो, येटाळीम जमेरो..

केरीघर थामेरो, कटकट न कामेरो..

*माराकुटी करन फोडाला गालपण...!*

*आसो वेतो हामारो तांडेरो बालपण...!!*

जुने मळेम साखऱ्या,दुधी बोर

खाटोमीटो खायेसारु वेजावा चोर

जतनायीन रेतोतो हरिभाऊ कोर

पकडागेतो गाळी खावा वोर

*ढोर चरातूचरातू खरादा मालपण..!*

*आसो वेतो हामारो तांडेरो बालपण..!!*

हानुमानेर पारेप भरातीती शाळा

मातेमायी बेसं कोनी मासतरेर फळा

आकीआंग दकाव बळदेरा गाळा

मातेमायी फरुकर रमतीर माळा

*मासतरेर मारखान पूठो वेजाव ढालपण..!*

*आसो वेतो हामारो तांडेरो बालपण..!*

पगेपरेर आची वेयदा कोनी गुमडी

आळी आळी तांडेम मारुकरा बुंबडी

ओलांडया काडेन लातेते तुंबडी

झोकाखावं बरु लेरा लेऊकरं लांबडी

*देकेसरीको रेतोतो हामारो तालपण..!*

*आसो वेतो हामारो तांडेरो बालपण..!*

बगर साबणेर जांबुडायाम पोयरो

होळा हुल्डा वूंबी भूंजन खायरो

भूतेर डर तरी जागलीन जायरो

खेकड माचळी पकडन लायरो

*बापेर चापटेती सुजजाव गालपण..!*

*आसो वेतो हामारो तांडेरो बालपण..!!*

गुंदेसारु फरुकरा खुडी आन खोळी

आंबा तींदू आंबली मीट लागं चारोळी

घनगडी यीस्टाप रमेन काच्या गोळी

सणेन पोळी, न्यारीन बाटी शीळी

*मंगाळेर माकी कटान वेजावा लालपण..!*

*आसो वेतो हामारो तांडेरो बालपण..!!*

रपीया दी रपीया लेन जतरान जायरो

मुरमुऱ्यार लाडू चळकान खायरो

सिटी पुंगी वजाते घर होटो आयरो

कनायी बाजेप कनायी हेटज सोयरो

*हारेथाके डीलेप याडी वोडादं शालपण..!*

*आसो वेतो हामारो तांडेरो बालपण..!!*

...

*©®कवी. निरंजन मुडे.*

बदलापूर,मुंबई.

९०८२१९९८६७