संपादकीय
जगेम चालू छ जे युद्धमय स्थिती ,दनपर बधरो जे प्रदुषण ,निसर्गेर बदलती स्थिती जेर परिणाम कृषी क्षेत्रेप जास्ती हेरोछ .मनक्यार मुंडयांग हुबी हेरी जे सारी समस्याती मुकाबला करन आयेवाळे सालेम एक सक्षम अन नवविचारेर प्रगत समाज निर्माण हेणू यीच आमना छ . २०२३ ये सालेर दवाळी सारीन हसी खुसिती रकाड .यी इच्छा व्यक्त करुछू .
२०१७ ये सालेती दरसाल मराठी अन बोलीभाषा सोबत गोरबोली बंजारा भाषर जनत करन ,वाचन चळवळ आंग बढायेर ,ये सोबत डिजिटल माध्यमेम गोरबोली बंजारा भाषान हिमतेशी हुबो करन लकवाळे हातेन ताकद देयेरो ये उद्देशेती स्वच्छंदी भरारी e –दिवाळी अंक बणाते आरेछा वाचेवाळे घणे लोक ये अंकेर बद्दल आचे मत अन पाठिंबा ऑनलाईन लिंकेर माध्यमेती दिने.
हामेन हुरूप आवगो .अन जे लोक सामजेन जगायेवास ,आंग बढ़ायेवास ,आपणी भाषा संस्कृती ,टकान रकाडेवास आपणे पारंपारीक संगीत साथ लेन रातदन तांडोतांडो जगाते फररेछ असे थाळी नांगरा वजान भजन बोलेवाळे भजनकरी कलाकार लोकुप्रती कृतज्ञता व्यक्त करेवास स्वच्छंदी भरारीर गोरबोली बंजारा भजन विशेषांक तयार करेर एक विचार मनेम आवगो.अन समाजमाध्यमेती संपादकीय मंडळ गोरबोली बंजारा भजन विशेषांके वास साहित्य देयेर आवाहन किदो .अनेक मान्यवर ये वातेर स्वागत किडे.अन आज गोरबोली बंजारा भजन विशेषांक तमार हातेम देतुवणा घणो आणद हेरो छ .
मा.मांगीलाल राठोड ,साहेब भीमणीपुत्र मोहन गणुजी नायक ,याडीकर पंजाब चव्हाण ,प्रा.एकनाथ राठोड ,निरंजन मुडे,कवी सुरेश राठोड ,प्रा.डॉ.सुभाष राठोड ,पी.के.पवार ,ता .धों.चव्हाण ,राजाराम जाधव ,सौ,निरंजना चव्हाण ,सौ.नंदा राठोड ,रमेश राठोड.विनोद राठोड ,प्रभाकर पवार ,संतोष जाधव ,डिगंबर राठोड ,विनायक राठोड , येनुर विविधांगी साहित्य ये अंकेरो साहित्यमूल्य बढ़ानाके.हाम सारी मान्यवरेर आभार व्यक्त करछा . लेख
सामजिक चिंतन ,भजन ,कविता व्यक्ती विशेष ,बंजारा चारोळी बंजारा भजनेबद्दल लेख आसे नाळी नाळी वातेरी दवाळी भेट . तमार हातेम देरे छा .
gorbolibanjararadio.com ये माध्यमेती ऑनलाईन रेडिओपर विविध कार्यक्रमेती बंजारा भाषर जनत करेर प्रयत्न चालू छ .भारत देशेसह जगभरेर लाखो रसिक श्रोता अन वाचक कार्यक्रम सामळरेछ अन e-बुक वाचरे छ .
तमार मनेन यी दवाळी भाय आस आशा व्यक्त करुछू . २०२३ ये सालेर दवाळी सारीन हसी खुसिती रकाड .HAPPY DIWALI २०२३
लिंक वर क्लिक करा व अंक वाचा👇
Comments