हाफ तिकिट.. ✍कवी-विनोद राठोड

हाफ तिकिट वेगोचं

एसटीती चालेची कांयी

चाल गोरी मारे सोबत

पोवरागड आयेची कांयी

लाल पिळे रंगेरो फेटीया

बिलोरी काचेर काचळी

दकायीस खलन छोरी

जसो चमचमती विजळी

गोर बाणो पेरेची कांयी

चाल गोरी मारे सोबत

पोवरागड आयेची कांयी...

नाकेमायी भू-या दरांवू

मीटी जिलेबी खरांवू

थंपसपभी परांवू तोनं

हातेम हात झलेची कांयी

चाल गोरी मारे सोबत

पोवरागड आयेची कांयी

नंजर भरलेन देका

सेवालाल बापून धोका

याडी साहेबनीन भजा

आरती वोवाळेची कांयी

चाल गोरी मारे सोबत

पोवरागड आयेची कांयी

होटो आवतूवना मातेम

बापूर विचार भर लांवा

द्वेष, कपट, अहंकार

आदी वाटेप छोडयांवा

प्रेमेर बोल बोलेची कांयी

चाल गोरी मारे सोबत

पोवरागड आयेची कांयी

--‐------------------------

©️®️✍

कवी - विनोद राठोड

कल्याण (मुंबई)